2018 Vulei Cung Mirum Bik Hna – Bill Gate Pa Hnihnak Ah Um Cang

Vulei cung mirum hna lak ah a rum bikmi tiah Bill Gates hi rak theih lengmang a si. Microsoft Company rak dirhtu le lutlai a si mi Mr. Bill Gates hi tukum 2018 ah cun vulei cung mi rum cem a si ti lo. A rum cem chang tu a si cang.

Forbes Magazine nih kum chiar Billionaire mi rum hna min list cu an tar chuah lengmang. Tukum an rak tar chuahmi hi a vun i phun dang deuh. Vulei cung mi rum bik cu Amazon Company dirhtu le hruaitu  Jeff Bezos a si cang. Vulei cung mi rum hna hi $100 billions tiang an rumnak a rak phan kho bal hna lo. Jeff Bezos hi tukum ah a phaisa ngeihmi an vun tuak i an tar langh tik ah $100 billions a ngei tin Ford Magazine nih a tial i, vulei cung mi rum bik a si cang.

Jeff Bezos hi Amazon company cu 1994 kum ah Seattle khua ah a rak dirhmi a si. A nih hi Princeton sianghleirun ah a rak kaimi a si. 2013 kum ah khan Washington Post thawng zamh ca cu $250 millions bak in a rak cawk. Cu pin ah Space travel timi vulei pinlei khual tlawnnak business zong a ngei rih. Hi vialte business a ngei caah hin a rumnak cu nikhat hnu nikhat a kai chin chin. Cu pin ah USA le vulei cung ram kip ummi hna nih Amazon website ah thil a cawmi an tam chin thluahmah caah hin a rumnak hi tihin a kai mi a si tiah zumh a si.

Amah changtu hna ah hin Bill Gates, Warren Buffet, Bernard Arnault family, Mark Zuckerberg tbk hna hi a chang chang in an si. Facebook dirhtu Mark cu vulei cun mirum (5)nak ah a um.

Bill Gate rumnak zong hi billion $90 ah a kai. Warran Buffet hi 84 billion le Mark hi 71 billions tiin an rum hna.

Vulei cung ah Billionaire tambik umnak ram cu US ram a si i, US ram lawng ah Billionaire 585 an um.  Mi rum tam bik chang umnak cu China ram a si i, billionaire 260 an um, a chang chin cu Germany a si i 130 an um, Russia nih a zulh i 118 an um.