NA TLAI HLANAH NA CUARPAR RAK I TAN!

Dr. Aung Myint Thang  nih atialmi hi, relphu te a si. Rak rel cio ve uh.

Cuarpartan timi cu pa zunzunnak a par vun tan dih khi asi. Curpar tan a fial hmasabik tu hi Pathian asi. Pathian nih hin thil aherh lo mi le atthalo mi hi a fale hna a kan fial bal lo. Muslims le Judah mi vialte cu an biaknak ruangah an cuarpar an i tan dih. Muslim pawl cu an chuah hnu in nihnihnak ah an cuarpar an tan hna. Judahmi nihcun ni riatnak ni ah an tan hna. Africa ram mi hna khi an nunphung asi ruangah an curpar an i tan dih ngawt fawn. Korea khi ngandamnak caah an cuarpar an i tan dih ngawt fawn. Kan nih kan Laimi tah? Kan nih kan Laimi cuarpar ai tan mi hi 1% kan tling lo men lai.
Laimi nih kan cuarpar kan i tan lo nak cu aruang pali a um. 1. Aherhlo mi ah nan ruah 2. Cuarpar tannak caah phaisa nan siang hna lo 3. Cuarpartan nan ning a zak 4. cuarpartan a biapitnak kong tthatein a kan cawnpiaktu an um lo.

Cuarpartan a tthatnak hna cu a tanglei bantuk hin an si. Na lung a tlin ahcun thaizing hrimhrim ah vai tan. Cun nan pasalle le na fapa le hna nih an duhlo ahcun nupile hna nih a rannak in nan fial hna a hau.

1. Cuarpartan nak nih pa chia/ttha cancer chungin a kan khamh khawh. Pa cheukhat cu an i filhhnawmh ngaingai. Kan Laitlang lebang ahcun zarh khat voikhat lawng ti ai khawlh mi an tam. Cunpinah tikhawlhnak khan adangtein an ngeih lo caah zaapi hmai i ti i khawlh atam i, an chia/ttha kha mihmaika ah tthate le thiangte in an i ttawl ngam ti hna lo. Kum tampi chung chia/ttha achunglei an tawl lo tikah cun hnawm le athumi rim kha ai khawng chin lengmang i cancer ah ai cang kho. Acheu cu chia/ttha vun in cancer ai thawh i cucu “penile cancer in situ” tiah a min an sak. Cucu achia/ttha ah a karh i Squamous Cell Penile Carcinoma ti asi. Cucu a karh (Metastatic asi) tikah tthal ah a bo i, a hnu ahcun hma a tuah i damh khawh asi ti lo. Cuarpartan lo ruang le filhhnawmh ruang in aithawk mi asi. Cuarpartan mi chia/ttha cu a thu kho lo, a rim a chia kha lo, a tawl a fawi.

2. Cuarpar ai tan mi hna caah cun nu le pa ihttinak in a chuahmi zawtnak in i chawnh khawhnak lam a tlawm deuh. Abikin HIV hi i chawnh khawhnak lam a tlawn deuh ngaingai..

3. Cuarpartannak nih zun kalnak lam i a um mi zawtnak (urinary tract infections) phunphun i a khamh khawh.

4. Cuarpartan cu nupi le nauinn caah ngandamnak asi. Cuarpartan lo ruangah vale hna nih an nupi le an chiattha thurpi he an ihpi lengmang hna caah an nupi le nauin ah hnawm aikhawng peng I nauin damlonak a chuak. Cuarpar ai tan lo mi vale hna I an nupile cungah a tlung kho ngai mi zawtnak cu nauinn par cancer (cervical carcinoma) asi. Nu pakhat cu a no te rih nain, a nauinn cancer si ai timh cang caah, a nauinn kha an laakpiak. Cutiasibucun, an pa nih cuarpartan a hau lo a ti rih. Kei mah nih ka cuarpar kai tan lo I ka chiattha a thur mi pi he ka ihpi peng ruangah kan nu nauin cancer asii kho ve ti hi a ruat awk a thei lo.

5. Nupile zongnih tan lomi nakin tan mi an I lunghmuih deuh ti a si. Cuhmahahcun rual huaha loin tan mi an duh khun tiah Korea nihcun an ti.

Cuarpartan lo cu mah ca he nupile cahe a risky tuk caah cuarpartan cu sibawi thiam nih cun an recommend dih mi a si. Korea cu pa poh an I tan dih. (Biblical Perspective in ka chim lo. Medical perspective in ka chim).