CBCUSA Civui Vui (6)nak Indianapolis ah July 6-8 tiang

USA ram i Chin Khrihfabu lawngte (102) komhmi CBCUSA civui cu Indianapolis ah July zarkhatnak weekend (July 6-8) ahan tuah lai. ICBC Khrihfabu nih innn tek in an lak dingmi a si.

USA ram ah Chin Khrihfabu a tambik fonh in tuahmi Chin Baptist Churches of America (CBCUSA) civui a vui 6nak cu Indianapolis, IN, USA ah tukum hi tuah a si lai. CBCUSA Civui kong he pehtlai in CBCUSA headquarter office ah CCI nih contact kan tuah hna i mah hi civui kong cu kan hal hna.  CBCUSA ah hin Chin Churches lawngte (102) an um tiah theih a si. Indiana Chin Baptist Church (ICBC) nih inntek in tukum CBCUSA civui cu tuah ding asi tiah kan theih.

“Tu tan tuah dingmi hi CBCUSA i a vui 6nak civui a si lai i, hruaitu upa hna thimnak election zong aum chih ding a si. July 5-8 2018 hi tuah a si lai. July 5 ni khi cu meeting tuah dingmi BM palai hna simi khual an phan hmasa lai. Cun cawn July 6 ni khi meeting a si i, election tuah ding ni cu a si. July 6 zan, July 7 chun he zan he, July 8 chun tiin pumhnak khawmpi cu a um dingin timh a si.” tiah CBCUSA office Secretary a simi Pu Kepling Khengmual nih CCI sin ah a chimh.




CBCUSA civui a vui (5nak) zong hi Indianapolis khua ah 2015 kum ah rak tuah a si i, mah lio Zophei Christian Church (ZCC) a tu Zophei Baptist Church nih inntek in rak tuah a si. Khual tampi an rak phan i, Indianapolis khuami caah thluchuah ngai a rak si.

Tutan a vui6nk civui ca zong ah khual zeizat hrawng dah phan ding ruah chanh a si tiah CBCUSA office cu kan hal hna.
“USA ram State dang dang in Khual 2000+ leng hi phan dingin ruah chanhnak kan ngei.” tiah CBCUSA office lei rian ngeitu hna nih a chim.

Civui tuahnak ding hmun cu “Greenwood Gathering Place” ah hin a si lai ti zong in kan theih. Greenwood Gathering Place cu 2015 kum lio i CBCUSA vui 5nak civui rak tuahnak hmun a si. 2013 kum lio zong ah CYONA conference tuahnak hmun a si fawn. Hmun tha ngai a si i, minung tam ngai te a tlumnak hall nganpi a si. Chin mi tampi umnak sang ah a um mi a si.

Mah hi vui 6nk Triennial Civui ah hin Kawlram lei in “Chin Baptist Convention in siseh, CACC le Association dangdang cio in sawm mi khual lian hna zong an phan ding a si. Cun, Mizoram Mara district lei in GS le EM, le Lawntlai Laimi Khrihfabu in GS le EM hna siseh, Bawm ram in minung (2) hna zong phan ding an si. Europe le Australia ram lei zong in zumtu hna sawm an si, an rak phan ve lai” tiah CBCUSA headquater office in thawngpang kan theih.

Ref: CCI Website www.indychins.org