Saisih Chuak Lam Caah Lung Nem An Hman tiah Ruah A Si

Hakha Thantlang in Mizoram Saisih khua tiang mawtaw lam a pem dingin an tuah cuahmah lio a si. Cu lam cu ‘Saisih Chuak’ lam ti zong in theih a si. Cu lam an tuah cuahmah mi ah lung an hmanmi hna cu a hmutu le a theitu vailam tlang mipi nih an lung a tling lo.

Lung an hmanmi cu lungmot, lung a nemmi pawl lamkam ah an ponmi cu (hmanthlak bantuk in) hmuh a si. Mah hi lung pawl hi hmun khat te lawng si lo in hmun tam nawn pi ah an pon tiah theih a si. Vailamtlang ah hin lunghak lakkhawhnak hmun tete zong a um ve ko nain, lungnem mi hi a man fawi deuh in hmuh khawh mi a si caah contractor caah phaisa a hlawk deuh ding a si.

Si hmanh sehlaw, lam le sul caah sau a nguh dingmi lungphun an si lo tihi theih khawh a si.

Hi kong he pehtlai in “Saisih Chuak Lampi Lung Phah An Timhmi Kong Hi Fiang Tein Tuanvo Ngeitu Nih Kan Hlatpiak Hna Seh Law Atu Hmanthlak Ka Thil Chihmi Lung hi hman an timh taktak ko ahcun CONTRACT an pekmi hna hi chut tthan hna uh…. A bik in kan Vice President Pu Henry Vanthio Hrimhrim nih a hlattu ding minung kan thlahpiak seh law ti ka duh. Amah thawng in hi lampi hi kan ngeih khawh dingmi zong a si.” tiah facebook ah upa pakhat nih duhnak a langhtermi zong an um.




US Chin news riantuantu nih a rannak in Saisih chuak lam contractor a lami hna cu Halkha ah hlat a si. Company pakhat lawng si lo in, tuanvo ngeitu hna nih contract an pekmi an um len caah zei zawn deuh a si timi hliah khawh  a si rih lo. Contractor pakhat nih “Fur lio a si, lung kha cirhcetnih a neh i, a nem mi a lo caah a si. Sacin ciauk lawngte a si ko la, hmanthlak pakhat zoh in lungmawt a si ti awk cu a har men lai” tiah a ti ve.

Chin State chung ah lam tampi cawh cuahmah a si i, contractor pawl nih i lak cio a si. Contractor pawl nih zulh dingmi le tuah dingmi hna cu tha tein nawl chuah cia a si tiah theih a si. Si hmanh seh law, tuanvo petu hna lei nih an hnu zulh in check thannak lei ah chanbaunak nganpi a um rih.