Thantlang ah Aung San Lem an tuah mi a poinak a um lo

A tialtu: Dr. Aung Myint Thang 

1. Kawl le Lai cu kan duh zong doh lo zong ah ram khat kan si cang i, tthen duh hmanh usih law thisen tampi na luyang lai, kan chuah kho fawn lai lo caah, ramkhat a si mi Kawl pawl hi doh peng ding a si lo.

2. Aung San Idol hi kan biak ding ah an kan serpiakmi asi lo. Cucaah Thlarau lei in a sualnak a um lo.

3. Aung San cu Phaisa hmanh ah an cuanter mi a rak si ko i, Laitlang zong ah cu phaisa cu buailotein kan rak hman peng mi a si ko.

4. Ne Win, Tan Swe tehna statue cu kan tuah lai an ti ahcun buaiphu asi, Aung san cu buai ding a um lo. Kawl ahcun an mah cung an ttha bik.

5. Aung San nih Laimi hna Kawl le states dang pawl he ram khat i um ding i a rak kan ti lio ah khan, kan duh lo buin Aung San nih Chinmi hi a kan luhtermi kan si lo. A kan sawm i kanmah lungtlingtein a rak lut mi kan si. Kan vanchiat caah Aung San cu a thi zau. Athih hnu in misual nih Kawlram an vun uk caah Laimi kan limhang a zawr i a si ko.

6. A fanu Aung San Suu Gyi hrim hi Laimi a kan daw taktak mi a si. Laimi Khrihfa hna Vice President a vun ttuantertu hi a mah dawtnak thawngin a si. Myone dang nih an khap hmanh ah Thantlang peng nihcun khap ding asilo.

7. Hmailei i Kawl sinin independent hna kan hmuh asi le hrawh tthan khawh a si ko. Cun, kan Laimi pasal ttha statue zong tuah kan duh ve asiahcun tuahnak ding hmunhma tampi a um ko.

Acknowledgement
Dr. Aung Myint Thang cu Korea ram in Biaknak lei Degree sang Doctorate degree a lami a si. Tu lio ah Kawlram ah Pathian rian mission rian le, Bible Sianginn a tuah i sianguk zong a tuan liomi a si.