US ah Chin Mipi Cheukhat USCIS nih Interview Auhmi A Dai

Tu kum hram thawk hrawng in USCIS nih interview auh thanmi hna cheukhat an um nain, atu cu cakuat thar an kuat chapmi a um in theih a si ti lo. USCIS nih Chin mi zei maw zat cu interview an rak auh than hna i, Malaysia in an rak ratning le an sining cang tbtk hal thannak an rak tuah.

US ah Chin mi thawngpang he pehtlai in Indianapolis khua ummi CCI cu US Chin News nih pehtlaihnak kan tuah “March thla dih lei sang in Chin mi tambik umnak hmun Indianapolis, IN USA ah siseh a dang dang ah USCIS nih cakuat thar an kuatmi theih mi an um ti lo” tiah Chin Community Secretary Biak L Sang nih US Chin news sin ah a kan chimh.

Dallas, TX lei zong ah cu ve thotho in USCIS nih auh thanmi milu a thar an um ti lo tihi theih a si. Dallas TX hi tuan bik ah USCIS nih Chin mi an auhnak hmun a si i, tuan deuh in a dai than ve ti khawh a si.

USCIS nih auhthanmi thawngpang kong ah Chin mi tampi cu lungrethei ngeihchia ngai in rak um cio a si i, Community upa hna le Biaknak lei upa le te nih cozah lei ah chimchawnnak tete an tuah.

Hi kong he pehtlai in Pu Lalbat Cinzah nih tihin a chim;

“US i khua a sami Chin miphun dihlak thlichia hrang bang atu lio uscis interview thawngpang nih zaan ih merem kho lo, rianttuan thatho lo le umkhua nuam loin a kan tuah dih. Zeitindah hmailei kan tthut to ning asi lai ti ruah ah van a sang ngaingai. Hi bantuk chimpit vansang dirhmun kan phak ahhin zeidah kan tuah awk asi? Dai tein maw kan um ziar lai?  Interview kawh lomi nih tah vaibaar lo tein tuah khawhmi kan ngeihlo tiah kan um sawh lai maw? Kan tuah ding ttha pakhat lawng a um. Cucu lei le van ah nawlngeitu cungnungbik Pathian sin sual thupha cawi le a hmai kawl asi. Na zum maw unau? Na zum kho maw? Mi tthenkhat nih thlacam zong a sawt lo. “Kan tuh bang kan zuun a hau ko” an ti. Si ‘tuh bang zuun’ tawn asi ko.  Sinain cucu nawlbia phung dik tang ah asi. Nawlbia phung nih a chuahpimi hremnak, dantatnak le thihnak in a kan luatter khotu cu Pathian vel lawng asi.” tiah Khrihfabu thawngzamh forum ah a tial.