Indianapolis USA i Chin nungak dawh ho dah that?

Chin lengnu no Khuang Hliang Par kum (27) a thihnak kong cu thawngpang cheunih an rak tial i, mipum in thil sining a thei deuhmi hna nih chimmi le FB post mi tete zong a um pah cang. US Chin news nih dikthlir deuh tein kan hlat tik ah ho dah Khuang Khuang cung ah hitluk dawhcah lo thil hi a tuahtu a si hnga timi hi tihin kan hun langhter ve.

Christmas nithla a si caah Indianapolis i Chin mipi tampi cu rian i dinh ni a si. December 22 zarhteni hi Chin mi tam ngai umnak Indianapolis ah cun a khua khua in Christmas tuah a tam ngai ni a si. Khrihfabu hna zong nih Christmas ni caah an buai lio caan te khi a si. Chin leng nu dawh, a tung ruang zong a za bakmi Rosy (aka) Khuang Khuang zong cu hawi le Christmas don le nuam ding kha ai tim bikmi a si theo lai.

Khuang Khuang hi Vuangtu khuami a si, a unu le a unu vapa hna he inn khat khuasa tti cu a si. An chung tein Vuangte Christmas kal ding cu rak i tinh a si nain, a ni ah hin Khuang Khuang cu “Ka hawi nu tha pakhat he chuncaw kan ei tti lai, cun thil ka thit ter lai i, nuamhnak ah ka kal lai” tiah a chung le a chimh ta hna i Vuangtu Christmas ah kal ve lo in a um – tiah a chungkhat simi Pu Daniel Sakhong nih a chim. A chung le Vuangte Christmas ah an kal i, heh tiah phone an call zong ah an call kho ti lo. Ahnu bik cem text message cu a unu vapa sin ah a kuat “Michigan lei ah kan kal..” timi text 2:15pm ah a rak kuatmi a si. A unu vapa nih Khuang Khuang hi heh tiah phone a call nain, ph a let ti lo. Cu ti cun a chung le cu Khuang Khuang cu a hawi le he a um theu lai tian cun an hei um ko.

Ruak a hmu hmasa tu cu…
December 23, 2018 ni hi Christmas lai Sunday a si i, Indianapolis zingka TV channel simmi WTHR Channel 13 nih 11:40am ah TV thawng zamhnak an tuah i a tlangpi ah “Hnawm hlawnhnak chung ah nu pakhat ruak an hmuh” ti a si. Cu TV ah fiangtein an chimmi cu “A resident, taking out the trash discovered the body, of the Country Club apartment” tiah an thanh. Country Club apartment ah ummi pakhat nih hnawm a lak lio ah mah hi ruak cu a hmuh, tiah fiang tein an chim. Mah hi tiang ah hin Chin mi a si tiah theihmi a um rih lo.
ICBC cu Ruakchiahnak hmun nih an rak pehtlai 
Indiana Chin Baptist Church (ICBC) Facebook page ah Marion County Coroner timi mithi ruak cekhlatnak hmun nih an rak pehtlaih hna. Khuang Khuang asi timi hi ‘finger print’ an tuah hnu ah an theih i, a kum hi kum (20) tiah ruah domhin an chim. ICBC Facebook zohkhenhtu mino tuanvo ngeitu Rocungnung Tluangneh nih ICBC Facebook page ah siseh Indy Chin Viber group hna in siseh thawng halnak a tuah. Tlawmpal ah Khuang Khuang chung le he pehtlai a si. Cu ti cun a chung le sin ah dothlattu detective hna le community upa le pastor te hna an phan cio i thawngpang fiang deuh in an theih chapmi cu Khuang Hliang Par kum 27 a si timi kha a fiang.
Ho dah mi thattu a si hnga?
Khuang Khuang chungtel a sinak Khrihfabu Zophei Baptist Church pastor simi Rev. Dr Thla Or nih December 24 2018 ni Biakinn ah chungkhar thutpinak an tuah lio ah tihin a chim “Mithat tu pa zong cu Peter Jackson” asi tiah sungthoh pa nih a ka chimh ti kha zapi sin ah a thanh.

Peter Jackson cu ho dah si? Peter Jackson (a min tak dang kho men) hi Chin miphun pakhat a si. US ralkap ah a lut bal tiah theihmi a si. Indianapolis ah khua sami a rak si i, Walmart warehouse riantuannak ah Khuang he hin rak i thei hna seh law dawh. A nih hi Khuang he hin mipi theih in aa duhmi nungak tlangval an si. October thla dih ah khan Colorado Spring ah Khuang le Peter hi an rak umtti. An tluang lo caah Khuang a chung le nih vanlawng in an hei don i Indianapolis ah an rak kirpi. Khuang u le nih an chimnak ah Peter nih hin fak tuk in a rak velh caah an hei lakmi a si. Peter Jackson hi Colorado Spring ah a um tiah ruah a si.

Dr Thla Or nih a chimmi hi a dik ko maw? timi ruah awk belte a um. A ruang cu, zei dang Indiana Local news hmanh ah hi kong hmuh khawh a si lo. Christmas thaizing lawng ah autopsy result a um lai ti lawng an tial. Cu tik ah confirm tuah awk a tha lomi a si.

Cun, Peter hi Chin mi pakhat a si. Mino lungfim cathiam pakhat a si. US Army ah hin mi sawhsawh luh khawh si lo. Mi za pakhat a si ve mi nih, mi pakhat thah i, cu ti men cun a hlawnh hnga maw? Cun, police nih Peter hi an tlaih timi thawngpang a um rih lo.

Si lo ah zei tin dah a thih kun hnga?
A ruak hmuhnak hmun hi Apartment pakhat a si. Mah hi hmun hi crime, drug tha lo tbtk atamnak hmun cu a si. Khuang2 nih mah ni ah khan ho dah a hei ton? Ziah Vuangtu Christmas ni ah kal ve lo in “zing ka ah thil timh in inn in a chuah hnga?” Khuang Khuang hi December 20-21 ni zanlei ah khawi ka dah a um hnga tbtk pawl hi theih awk tha ngai pakhat cu a si. A ruak an chiahtanak hi zoh tik ah khurkhua ruat lem lomi nih tuahmi thil a lo deuh. A kutcung ah sui thilri hna a tanta ko caah mifir damiah nih tuahmi si lo ti cu a fiang.