Thailand Lungkua le Hngakchia Hna Kong Pehpar

Kum 25 a simi nih a hruaimi pumpalulh chuih thiam Thailand mino rual hna cu Lungkua pakhat ah an lut i, an chuah hlan ah ti nih a rak lianh khenh hna. An nih kong hi vuleicung nih cuanhmi konglam pakhat a hung si. Ai phun dang deuh ngaimi lungkua, Thailand cozah nih a rammi a zohkhenh hna ning le chanchuah ning hna hi vuleicung mipi nih ngiat thlai awk thil pakhat a hung si.




Mah hi pumpalulh chuihthiam mino rual hna hi kum (11) in (17) kar an si.  An nih hi ‘ngal khaat’ pumpalulh phu (Wild Boar) Soccer team member hna an si. Exercise tuahnak caah le thil theihnak caah tiah lungkua ah hin an rak kal cu a si. An nih hi June 23 ni ah khan mah hi lungkua lei ah an rak kal cu a si. An kal ni in a kir ti lo tik ah, an tlau cang tiah a thaizing bak in kawl hram an rak thawk.

Lungkua a min cu Tham Luang Nang Non timi a si. Thailand ram Changrai Province ah a ummi lungkua pakhat a si. Cu lungkua a min sullam cu ‘Great Cave of the Sleeping Lady’ aa hngilh mi nungak lungkua tiin a sullam a si. Mah hi lungkua cu Thailand cozah nih 1986 kum tein Forest Park pakhat ah rak zoh khenhmi a si. Tham Luang Khuan Nam Nang Non Forest Park tiah theih a si. Tourist hna le ram chung ram leng mi leng hna nih an pal lengmang nak ramtang tlawn lennak Park hmun pakhat a si. Mah hi Lungkua hi tuanbia a rak ngei. Hlan lio ah Saingpahrang fanu cu lothlo fapa he an i duh i, fa a rak pawi. Khen khamnak ruang ah an rak zaam i mah hi lungkua chung ah cun an rak i dup. Tlangval pa cu rawl kawl ah a leng a rak chuah lio ah Siangpahrang ralkap he an i hmu i, thah a tong. Siangpahrang fanu zong cu duhmi he thihtian ruang ah a lungfah celh lo in naam in aa chun ve i a thi, a thisen cu tiva bang in lunglak khin a chuak i lungkua chung ah cun vacek ah ai cang’ tiah Thailand tuanphung an rak ngei.

Thailand le Kawlram ramri ah a um mi mah hi lungkua ah hi thingram a chahnak hmun a si nain minung khuasaknak hmun he ai hlat tuk lomi hmun a si. Kawlram Tachilik khua hi Kawlram lei sang lei Thailand lei sang tiah ai then, Thailand lei hi thlang lei ah a sau ziah mah. Mekhong tiva le Kawlram rami karlak ah mah hi Lungkua hi a um. Lungkua kiangkap ummi hna hi Kawrlam Shan miphun tampi an si. Kawlram ramri in Suimilam tlawmpal te chung ah phak khawhnak hmun a si.

June 23 ni thawk in ruahpi a tuk hringhran caah vacek tete ti an lian. Lungkua chung ah ti an lut tik ah lungkua hmun tampi cu ti in a khat cawlh. Cu tik ah hngakchia hna hi ti nih  a phun dih cang theu hna lai tiah ruah an si. July 2 2018 ni tiang ah khan zei an can ti theih an si rih lo. Thailand Neavy Seal hi Thai ralkap lak ah a caak bikmi le a thiam bikmi commando an si. An mah nih an kawl hna. An hmu hlei lo. England rammi tipil a thiam mi hna nih an zuan hnawh hna i, lungkua chung ah cun ti an pilh i an kawl. July 2 2018 ni ah hin mah hi  tipilh a thiammi ‘British divers’ hna nih hin hngakchia hna cu dam tein lungkua hmun khat ah an rak um mi cu an hmuh hna. A si nain, an rak chanh kho cawlh hna lo. An i tonnak hna cu Facebook ah live video in an rak thlah khawh i mi tampi nih rak zoh  a si. An umnak hmun an theih khawh cun chanhchuahnak lam an kawl i, tipil a thiammi hna nih ti an pilh i rawl an chanh hna. Mah tihin Thailand cozah nih hlawh pekmi mi tampi, kiangkap um khuami hna le volunteers hna dihlak minung 1000 hrawng nih chun he zan he din lo in an cawlcang.

July ni 8 ni ah khan hngakchia 8 cu an chanh chuah khawh cang hna. An hruaitu coach simi pa le hngakchia 4 cu lungkua chung ah an tang rih ko. Hngakchia hna hi thipil a thiam lomi an tam pin ah lungkua chung ah sau lak te ti pilh in kal dingmi cu an caah a har hringhran mi a si. Cu tik ah hngakchia hna cu thil in tom i, oxygen pek in rak chuah pi an si.

Thailand Navy Seals a rak si balmi pakhat cu mah hi hngakchia rual kawlnak ah hin a nunnak a liam. Ti a pilhnak ah oxygen nih a dih khanh caah a nunnak dih in an lak.