Thantlang Khua ah Aung San Milem Kan Herh Lo – Salai Marau

April 12, 2018

NLD cozah nih Thantlang khua chung ah Aung San milem chiah dingin tu hi tendar an auh cuahmah lio a si i cu kong he pehtlai in Salai Marau nih a hmuhning cu a Facebook ah tihin a tial.

Thantlang khua chung ah Buchoh Aungsan Milem (Yiot-Tuh) tuah ding in Sipin nih sing 300 dih in Budget a suai i atu hi Tender a auh lio a si.

Hihi Buchoh Milem le hlei tuah kong ah Mon ramkulh zong ah mizapi nih doh le buapi a rak si bal. Kanmah le miphun nih pacan kan i ngeih mi tampi lak ah ziah Kawl miphun hruaitu zuk/milem cu kan i hunh lai tiah.

Hi sing 300 dih in Buchoh Milem tuah hi Thantlang nih kan herh maw? A dang tuah awk tampi a um lo maw? Lai miphun nih pa raltha, ram hruaitu kan ngei ve lo maw?

Laimi nih, Thantlang peng nih Lal Luai, Con Bik bantuk pa raltha, kan pa le tampi um ko bu ah Kawl miphun hruaitu Buchoh Milem i hunh ko zong hi zeitindah kan pipu hmai kan khah lai? Kan miphun hawi le peng dang hmai kan khap lai maw?

Hi sing 300 hin khuaram ca a dangdang tuahpiak ah a hlawk deuh lo maw?

Cucaah hihi kan khua chung ah tuah a si lo nakhnga khuaram a daw mi nih facebook na status ah tihin rak i tar ve.
—–

Tags:Politices