US Chin Nu Thatu Tiah Zumhmi Cu Palek nih an phuan – Hongkong in Thailand ah A zuang

Khuang Hliang Par (aka) Rosy thihnak kong he pehtlai in a phun phun in rak chim cio a si. Nihin (January 2, 2019) zanlei ah hin IMPD (Indiana Metropolitan Police) nih Khuang H Par thattu he pehtlai in zumh raih bikmi ‘alleged murderer’ cu Peter Van Bawi Lian kum (21) a si tiah an thanh.

Peter Van Bawi Lian cu US Ralkap ah active duty a si lio a si nain a umnak ralkap len ah thawng a thanh lo caah December 26 2018 ni ah khan ralkap nih ‘ralkap tlimi’ case in an rak kawl cawlh cang. A nih hi a nungak a simi Khuang Hliang Par cu fak ngai in a rak velh caah police nih a umnak Colorado Spring ah ‘second-degree assault and menacing’ timi case in December ni 3 2018 ni ah an rak tlaih bal cang. Thonginn a chuah khawh in a umnak Apartment nih an cohlang ti lo caah inn dang ah ai thial. A umnak cu Fort Carson Amy Base ah hin a hnu bik December ni 21 ni ah Peter cu an hmuh. Chicago airport ah a rak i thawh i cun Indianapolis airport ah December 22 2018 ni 4pm hrawng ah a rak phan – tiin police report a um.

December 22 2018 ni 2:15pm ah hin Khuang Khuang hi a hnu bik a chung le nih an pehtlaih khawhmi a si. Peter Van Bawi Lian Indianapolis ah a phanh hlan suimilam zeimawzat ah Khuang Khuang cu nungak hawi pakhat nih chuncaw eitti dingin le i nuam dingin phone a rak auh caah Khuang2 hi a umnak a u le inn in a leng ah arak kal.

Khuang Khuang ruak cu Zarhpini December 23 2018 ni zingka 11am hrawng ah an rak hmuh. A ruak an hmuhnak hi Khuang Khuang phone in arak autu a hawinu umnak apartment ah a si. A hawinu hi Chin miphun pakhat a si ve. A ruakhmu hmasatu hi homeless nu a si. Aldi shopping bag cu hnawmpung chung ah a ummi a hmuh caah a hei naih. Cun Suitcase pakhat ai zup thlu lomi a hmuh i cu chung ah zei dah um hnga tiah a kut a hei purh i minung ruak cu a hmuh. Cu ti cun mah apartment ummi pakhat cu cu nu nih a chimh i 911 an call cawlhmi a rak si tiah IndyStar nih a tial.

Peter Lian cu Khuang Khuang ruak an hmuh hlan December 23 2018 zingka ah hin Indianapolis in vanlawng in Hongkong lei ah ai thawh. Cun December 24 ni ah Bangkok, Thailand lei ah a zuang than ti zong in court document chirchan in indyStat news nih a chim. Cun, Khuang a thih lio bak ah hin Peter Lian hi khawika set ah dah a rak um timi hi a fiang lo tiah a chim rih.
Mah hi thawngpang he pehtlai in a theimi nan um si ah cun
 homicide office at 317.327.3475 or Crime Stoppers at 317-262-TIPS hna ah hin thawng thanh ding a si lai.
chirhchan:
1. IndyStar News
2. Fox59 News