USA ah Inn Man A Kai Tuk Hringhran

US ram chung ah 2013 thawk in inn man hi kumkhat hnu kumkhat a kai chin thluahmah. Chin mi tam bik umnak Indianapolis, IN hrawng inn man hna zong a kai ziahmah tiah Indianapolis um mi hna nih an hmuh. Inn man a kai pin ah hin cawk awk tiang hmanh hi a um setsai lomi dir hmun a si.

“Indianapolis ah hin 2013 ah ka rak i thial le cu lio ah cun inn hi sing khat nak tlawm mi a rak tam ngai te. A tha deuhmi inn tiah cun sing khat le hleinga hrawng hi an rak si. In ka rak i caw kho rih lo i, tukum 2018 ah hin inn cawk dingin ka kawl tik ah inn man hi singkhat le sawm li ($140000) leng an kai dih cikcek. Cunak tlawm mi cu cawk awk a tha tuk ti lomi inn hna an si.” tiah Indianapolis a um mi Pa Khar nih US Chin News sin ah a chim.

Indianapolis lawng si lo in, Chin mi tam ngai an umnak Dallas, TX le Washington DC area hna zong ah inn man hi van ah an kai dih tiah theih a si. DC Area hrawng ah cun inn man $250000 (ting hnih le sawm nga) leng kai lawngte an si i, cu hmanh ah cun square ft a tlawm mi te te lawng an si. Dallas area zong cu inn man a fak ngai. Indianapolis hi US i Laimi umnak khua ah cun inn man ai deng biknak khua cu a si. Cu zong ah cun inn man cu a fak ngai thiam thiam rih.

US ram ah hin ram pi huap in sipuazi a that a si ah cun, inn a caw duhmi an tam caah inn man hi an kai. Inn man a kai mi zoh in hin, US chawletnak a thangcho ziahmah timi khi tuak awk a tha. Indianapolis i Laimi um mi hna hrim hrim zong kumkhat hnu kumkhat in innchungkhar pakaht nih hmuhmi income zong a tam deuh ziahmah mi hmuh khawh a si.